ಪ್ರಜಾಸ್ತ್ರ ಸುದ್ದಿ
ಬೀದರ(Bidar): ಬರೋಬ್ಬರಿ 6 ಕೋಟಿ 50 ಲಕ್ಷ ರೂಪಾಯಿ ಮೌಲ್ಯದ ಗಾಂಜಾವನ್ನು ಬಸವಕಲ್ಯಾಣ ಗ್ರಾಮೀಣ ಪೊಲೀಸ್ ಠಾಣೆ ವ್ಯಾಪ್ತಿಯ ರಾಜೇಶ್ವರ ಗ್ರಾಮದ ಹತ್ತಿರದ ಎನ್ಎಚ್-65ರ ಬಳಿ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಹೈದರಾಬಾದ್ ಕಡೆಯಿಂದ ಸೋಲಾಪುರದ ಕಡೆಗೆ ಸಾಗಾಟ ಮಾಡುತ್ತಿದ್ದ ಗೂಡ್ಸ್ ವಾಹನದ ಮೇಲೆ ದಾಳಿ ಮಾಡಿ 650 ಕೆಜಿ ಗಾಂಜಾ, ಗೂಡ್ಸ್ ವಾಹನ, 8 ಲಕ್ಷ ರೂಪಾಯಿ, 120 ಖಾಲಿ ಮೊಟ್ಟೆ ಟ್ರೇ ವಶಪಡಿಸಿಕೊಳ್ಳಲಾಗಿದೆ ಎಂದು ಎಸ್ಪಿ ಪ್ರದೀಪ್ ಗುಂಟಿ ತಿಳಿಸಿದ್ದಾರೆ.
ಎಸ್ಪಿ ಪ್ರದೀಪ್ ಗುಂಟಿಯವರ ನಿರ್ದೇಶನದ ಮೇರೆಗೆ ಹುಮನಾಬಾದ್ ಉಪ ವಿಭಾಗದ ಉಪಾಧೀಕ್ಷಕರಾದ ಮಡೋಳಪ್ಪಾ ಪಿ.ಎಸ್ ಇವರ ನೇತೃತ್ವದಲ್ಲಿ ಮಂಠಾಳ ಸಿಪಿಸಿ ಅಮೂಲ್ ಕಾಳೆ, ಬಸವಕಲ್ಯಾಣ ಪಿಎಸ್ಐ ನಾಗೇಂದ್ರ, ಗ್ರಾಮೀಣ ಪೊಲೀಸ್ ಠಾಣೆ ಸಿಬ್ಬಂದಿಯಾದ ಗುಂಡಪ್ಪಾ, ಬಲವಂತರೆಡ್ಡಿ, ದೇವಿಂದ್ರ, ಹಣಮಂತ, ವೆಂಕಟ ಯಾದವ, ವಿಶ್ವನಾಥ, ಶಿವಾನಂದ, ಶಂಕರ, ಶ್ರೀನಿವಾಸ, ರಮೇಶ ಪಾಟೀಲ, ಕೃಷ್ಣಾ, ಮಾರುತಿ, ಸುನೀಲ ತಂಡ ದಾಳಿ ನಡೆಸಿದೆ. ಆರೋಪಿತರ ವಿರುದ್ಧ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
