ಪ್ರಜಾಸ್ತ್ರ ಸುದ್ದಿ
ಬೆಂಗಳೂರು(Bengaloru): ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ನಡೆದ ಅನಾಹುತಗಳು ಒಂದೊಂದೆ ಬೆಳಕಿಗೆ ಬರುತ್ತಿವೆ. ಸ್ನೇಹಿತರ ಹುಚ್ಚುತನ ಸವಾಲಿನಿಂದಾಗಿ ಯುವಕನೊಬ್ಬ ಪ್ರಾಣ ಕಳೆದುಕೊಂಡಿರುವ ಘಟನೆ ಇದೀಗ ಬೆಳಕಿಗೆ ಬಂದಿದೆ. ಕೋಣನಕುಂಟೆ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಅಕ್ಟೋಬರ್ 31ರಂದು ನಡೆದ ಘಟನೆ ಇದಾಗಿದೆ. ಶಬರೀಶ್(32) ಮೃತ ಯುವಕ ಎಂದು ಹೇಳಲಾಗುತ್ತಿದೆ.
ಘಟನೆ ಹಿನ್ನಲೆ ಏನು:
ಕಳೆದ ಅಕ್ಟೋಬರ್ 31ರಂದು ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಸಂತೋಷ್, ಕಾರ್ತಿಕ್, ದಿನಕರ್, ಸತ್ಯವೇಲು, ನವೀನ್, ಸತೀಶ್ ಹಾಗೂ ಶಬರೀಶ್ ಪಟಾಕಿ ಹಾರಿಸುತ್ತಿದ್ದರು. ಈ ವೇಳೆ ಪಟಾಕಿ ಹಚ್ಚಿ ಮುಚ್ಚಿದ ಡಬ್ಬದ ಮೇಲೆ ಕುಳಿತುಕೊಳ್ಳುವ ಸವಾಲು ಹಾಕಿದ್ದಾರೆ. ಕೂತರೆ ಆಟೋ ಕೊಡಿಸುವ ಆಮಿಷ ಒಡ್ಡಿದ್ದರಂತೆ. ಹೀಗಾಗಿ ಶಬರೀಶ್ ಡಬ್ಬದ ಮೇಲೆ ಕುಳಿತ್ತಿದ್ದಾನೆ. ಪಟಾಕಿ ಹಚ್ಚಿ ಇವರೆ ದೂರ ಓಡಿದ್ದಾರೆ. ಪಟಾಕಿ ಸಿಡಿದು ಯುವಕನ ಗುಪ್ತಾಂಗವೆಲ್ಲ ತೀವ್ರ ಗಾಯಗೊಂಡಿವೆ.
ಈ ಘಟನೆಯ ವಿಡಿಯೋ ಇದೀಗ ವೈರಲ್ ಆಗಿದೆ. ಗಾಯಗೊಂಡಿದ್ದ ಶಬರೀಶ್ ಮೃತಪಟ್ಟಿದ್ದಾನೆ ಎಂದು ತಿಳಿದು ಬಂದಿದೆ. ಈ ಸಂಬಂಧ 6 ಮಂದಿಯನ್ನು ಬಂಧಿಸಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಯುವಕರ ಹುಚ್ಚಾಟಕ್ಕೆ ಜೀವವೊಂದು ಬಲಿಯಾಗಿದ್ದು ಮಾತ್ರ ದುರಂತ.
