ಪ್ರಜಾಸ್ತ್ರ ಸುದ್ದಿ
ವಿಜಯಪುರ(Vijayapura): ಷೇಕ್ಸ್ ಪಿಯರ್ ಅವರ ಸಾಹಿತ್ಯ ಮತ್ತು ಸಂಸ್ಕೃತಿಯ ಮೇಲೆ ಶಾಶ್ವತವಾದ ಪ್ರಭಾವ ಬೀರುತ್ತವೆ. ಮಾನವ ಸ್ವಭಾವದ ಭವ್ಯತೆ ಮತ್ತು ಕತ್ತಲೆ ಎರಡನ್ನೂ ಪ್ರದರ್ಶಿಸುತ್ತವೆ ಎಂದು ನಿವೃತ್ತ ಇಂಗ್ಲಿಷ್ ಪ್ರಾಧ್ಯಾಪಕ, ಬರಹಗಾರ ಡಾ.ಆರ್.ಕೆ. ಕುಲಕರ್ಣಿ ಹೇಳಿದರು.
ನಗರದ ಬಿಎಲ್‌ಡಿಇ ಸಂಸ್ಥೆಯ ಎಸ್‌ಬಿ ಕಲಾ ಮತ್ತು ಕೆಸಿಪಿ ವಿಜ್ಞಾನ ಮಹಾವಿದ್ಯಾಲಯದಲ್ಲಿ ಐಕ್ಯೂಎಸಿ ಮತ್ತು ಸ್ನಾತಕೋತ್ತರ ಇಂಗ್ಲೀಷ್ ವಿಭಾಗದಿಂದ ಜೂನ್ 11 ಬುಧವಾರದಂದು ಆಯೋಜಿಸಲಾದ ” ಷೇಕ್ಸ್ ಪಿಯರ್ ಮತ್ತು ಅವರ ದುರಂತಗಳು” ಎಂಬ ವಿಷಯದ ಕುರಿತು ವಿಶೇಷ ಅತಿಥಿ ಉಪನ್ಯಾಸ ನೀಡಿದರು.
ಮಹಾನ್ ನಾಟಕಕಾರ ಷೇಕ್ಸ್ ಪಿಯರ್ ದುರಂತಗಳು ಮಾನವನ ಸ್ಥಿತಿಯನ್ನು ದುಃಖ, ವಿಧಿ ಮತ್ತು ಮಹತ್ವಾಕಾಂಕ್ಷೆಯ ಬಲವಾದ ನಿರೂಪಣೆಗಳ ಮೂಲಕ ಅನ್ವೇಷಿಸುತ್ತವೆ. ಸಾಹಿತ್ಯ ಮತ್ತು ಸಂಸ್ಕೃತಿಯ ಮೇಲೆ ಶಾಶ್ವತವಾದ ಪ್ರಭಾವ ಬೀರುತ್ತವೆ. ಹ್ಯಾಮ್ಲೆಟ್, ಒಥೆಲ್ಲೋ, ಕಿಂಗ್ ಲಿಯರ್ ಮತ್ತು ಮ್ಯಾಕ್‌ಬೆತ್‌ನಂತಹ ಅವರ ನಾಟಕಗಳು ಸೇಡು, ದ್ರೋಹ ಮತ್ತು ಅಧಿಕಾರದ ಭ್ರಷ್ಟ ಪ್ರಭಾವದ ವಿಷಯಗಳನ್ನು ಪರಿಶೀಲಿಸುತ್ತವೆ. ಷೇಕ್ಸ್ ಪಿಯರ್ ಪ್ರಪಂಚದ ತಮ್ಮ ದಿಟ್ಟ ದೃಶ್ಯೀಕರಣದಿಂದ ವಿದ್ಯಾರ್ಥಿಗಳಿಗೆ ಜ್ಞಾನೋದಯ ಮಾಡಿದರು ಎಂದು ಹೇಳಿದರು.
ಮಹಾವಿದ್ಯಾಲಯದ ಪ್ರಾಚಾರ್ಯೆ ಡಾ.ಆರ್.ಎಂ. ಮಿರ್ಧೆ ಅವರು ತಮ್ಮ ಅಧ್ಯಕ್ಷೀಯ ಭಾಷಣದಲ್ಲಿ ಷೇಕ್ಸ್ ಪಿಯರ್ ಅವರನ್ನು ‘ದೇವರ ದೃಷ್ಟಿ’ ಹೊಂದಿರುವವರು ಎಂದು ಬಣ್ಣಿಸಿದರು. ಪ್ರೊ.ವಿದ್ಯಾ ಆರ್.ಪಾಟೀಲ್ ಅತಿಥಿಗಳನ್ನು ಸ್ವಾಗತಿಸಿದರು. ಪ್ರೊ.ಶ್ವೇತಾ ಸವಣೂರ್ ಕಾರ್ಯಕ್ರಮವನ್ನು ನಿರೂಪಿಸಿದರು. ವಿದ್ಯಾರ್ಥಿಗಳಾದ ಪೂಜಾ ಮತ್ತು ಗೋದಾವರಿ ಕಾರ್ಯಕ್ರಮವನ್ನು ಉದ್ಘಾಟಿಸಿದರು. ಪ್ರೊ.ಬಿಲಾಲ್ ಪಾಣಿಬಂದ್ ವಂದನಾರ್ಪಣೆ ಮಾಡಿದರು. ಈ ವೇಳೆ ಸ್ನಾತಕೋತ್ತರ ವಿಭಾಗಗಳ ಅಧ್ಯಾಪಕರು ಮತ್ತು ವಿದ್ಯಾರ್ಥಿ, ವಿಧ್ಯಾರ್ಥಿನಿಯರು ಉಪಸ್ಥಿತರಿದ್ದರು.
